नुवाकोटको दुप्चेश्वरमा ग्लान सांस्कृतिक सङ्ग्राहलय बन्ने

२७ जेठ, २०८१

काठमाडौं । नुवाकोटको दुप्चेश्वर गाउँपालिका ४ बेतिनिस्थित नाम्सापुरानमा ग्लान थर भएका तामाङहरूको पहिचान झल्लिने सङ्ग्राहलय निर्माण हुने भएको छ । ग्लान समाज नेपालद्वारा आयोजित थातथलो भ्रमण कार्यक्रममा सहभागी हुन दुप्चेश्वर पुग्नुभएका संस्कृति पर्यटन तथा नागरिक उड्डयन मन्त्री हितबहादुर तामाङले सङ्ग्राहलय निर्माणबारे जानकारी दिनु भएको हो ।

जेठ २६ गते आफ्नै वंशको थातथलो पुग्नु भएका मन्त्री तामाङले ग्लान सांस्कृतिक सङ्ग्राहलय बनाउन सरकारले ९० लाख रुपैयाँ बजेट विनियोजन गरेको जानकारी दिनुभयो । उक्त रकम 'ग्लान उद्गमथलो ङारदिम संरक्षण तथा प्रवर्द्वन केन्द्र’ को नाममा विनियोजित भएको समेत उहाँले बताउनु भयो ।

सो ठाउँको भ्रमणमा मन्त्री लागयत ग्लान थर भएका तामाङहरू नुवाकोट ‍पुग्नुभएको भ्रमणमा संलग्न पत्रकार अर्जुन ग्लान तामाङले संवाद अनलाईनलाई जानकारी दिनुभयो ।

यसैगरी, बागमती जिल्ला समन्वय समितिका अध्यक्ष एवं जिल्ला समन्वय समिति मकवानपुरका प्रमुख ललित ग्लानले यसको ठाउँको संस्कृति जोगाउनुपर्ने बताउनु भयो । उहाँले ग्लानहरुले खोज्दै आउँदा ग्लानको थातथलोमा आफ्नै संस्कृति पाउनुपर्छ, त्यसको लागि वंशथलोको दिगो संरक्षण हुनुपर्ने आवश्यकता औंल्याउनुभयो ।

थातथलो अवलोकनको क्रममा बागमती प्रदेशका पूर्व सांसद ओमबहादुर ग्लानले यस थातथलोलाई चिनाउनका लागि बजेट विनियोजन गरेकोमा मन्त्री तामाङलाई धन्यवाद दिँदै थातथलोलाई सबैले विर्सन नहुने बताउनुभयो ।

त्यस्तै, बेतिनी डाँडामा निर्माणाधीन डम्फु पार्क र कुदाप क्याबा (चुल्हो) डाँडा पर्यटकको आकर्षण थलो बनेको छ ।

यस्तै गाउँपालिकाका अध्यक्ष शंकरबहादुर थापाले भाषा, संस्कृति र थातथलो पहिचान गर्दै गर्दा त्यस स्थानबाट छुटेर गएका अन्य ग्लानहरुलाई थप सहजीकरण समेत हुने विश्वास व्यक्त गर्नुभयो ।