संसदीय दलको नेता बदल्ने काममा लागिरहने : महामन्त्री थापा

संवाद अनलाइन
८ श्रावण, २०८०

काठमाण्डौ । संसदीय दलको नेता बदल्ने काममा आफू लागिरहने नेपाली कांग्रेसका महामन्त्री गगनकुमार थापाले बताउनुभएको छ ।

आज (सोमबार) पार्टी केन्द्रिय समितिको बैठकमा बोल्दै महामन्त्री थापाले संसदीय दलको नेता बदल्ने कुरा अहिलेको आवश्यकता भएकाले आफू अझै संसदीय दलको नेता फर्न लागिपर्ने बताउनुभयो ।

पार्टी सभापति शेरबहादुर देउवा ५ पटक प्रधानमन्त्री बनिसकेकाले अर्को नेता पार्टीको संसदीय दलको नेता बनोस् भनेर आह्वान गर्ने अपेक्षा राखेको पनि उहाँले बताउनुभयो ।
उहाँले सबै पुराना राजनीतिक दल संकटमा पर्ने कारण भनेको ३०/३५ वर्षदेखि ४/५ जना नेतामात्रै सत्ता र नेतृत्वमा घुमिरहनु रहेको बताउनुभयो ।

महामन्त्री थापाले आफूले पार्टी फुटाउने कुरा नगरेको भन्दै संसदीय दलको नेता फेर्ने कुरा गर्दा आत्तिन नपर्ने बताउनुभयो । महामन्त्री थापाले वर्तमान सत्ता गठवन्धनको नेता कांग्रेस भएकाले आफ्ना शर्तहरुमाथि सम्झौता गर्नु नहुने बताउनुभयो । उहाँले अबको ४ वर्षमा देशमा संघीयता चाहिन्छ भन्ने मनोभावना विकास गर्ने चुनौति रहेको उल्लेख गर्नुभयो ।